馬老板週記

客人喜好

2010-01-02T17:05:00.000+08:00

2日前去VCD鋪, 想租VCD睇. 過程中, 查詢了幾隻自己心水的VCD, 但係都租晒出去. 留低左自己個會員號碼, 等番VCD時佢可以搵我. VCD店個妹妹好盡力, 介紹左幾隻她的心水猛片給我, 仲話好好睇. 我講話我對她的推介無興趣時及離開時. 忍唔住多口講了幾句.

“姐姐呀, 你見我問個幾隻都係英文片, 你覺得你係唔係應該介紹番一些英文片給我, 而不是港產片呢?”

這裡, 我不是評論港產片定西片好睇. 但我們應該根據客人需要, 而定下一些配合要求的方案, 而不是根據自己的喜好呀.

「赤足心意行」步行籌款致詞

2009-12-13T12:06:00.001+08:00

這一年, 做了很多次的致詞. 這是我其中一次很喜歡的.

主禮嘉賓十大傑出青年協會主席麥永開
思源基金黎應錦顧問
慈航基金林漢武主席
國際青年商會香港總會總會會長黃民健
各位青商會友，
各位善長人翁，早上好！

再次歡迎大家今日出席「我們愛讀書2009」啓動禮暨「赤足心意行」步行籌款！

半島青年商會係一個訓練青年領袖的組織。今年係我地四十周年大日子。多年來，為社會培訓出不少政界及商界的領袖人物。而「我們愛讀書」絕對係我地一個旗艦的工作計劃，今年係十周年的盛事，共籌建了八間小學，二間中學，為無數的山區兒童，提供學習的機會。今年會籌建一間四十周年紀念中學。

好開心今日見到咁多朋友支持這個步行籌款。十年來，我地舉辦好多不同類型的活動：
 學校演說及籌款
 醫院籌款
 義賣利是封
 一年１～２次到中國貴州探訪當地的山區學童

我地做的一切一切，都係為左籌集建校及助學的經費同宣揚山區學童的學習環境及情況。有時，我地成１０個會友，去到一些學校做演說及籌款，可能只籌得３００幾蚊，但我們一Ｄ都唔失望。一些小學生，可能將他身上僅有的幾蚊，捐給我們。他的心意及對我們的感覺，比任何人都強烈。而他會對朋友及家人講起他今天的善舉，已經幫助了我們，宣傳山區學童的情況。

因為在個１小時的演說中，我地已經感動了校內３０多位的老師及數百位學生，只要他們每人同幾個朋友講今天的感受。已經可以有過千人對中國山區兒童增加了一點的關心。這樣，我覺得已經係成功了。今日在座的數百位家長、學生、及友好。我希望大家可以為山區學童有錢出錢、有力出力。感染你身邊的每一位朋友。做到最後，可以係中國大陸做到人人有書讀！

希望大家在這個旅程中有所感受，將你的所思所感告訴你身邊的人。
將你今日的經驗和你的朋友分享。

最後，祝大家身體健康。

劉若英與陳升的愛情故事

2009-12-05T18:40:00.000+08:00

在網上，看到一段文章，是劉若英與陳升的愛情故事　-----大愛這樣的女子，永遠的淡淡，淡淡。第一眼愛上，然後用一輩子

http://big5.elong.com/gate/big5/trip.elong.com/home/space.php?uid=38&do=blog&id=743

很多香港人也認識劉若英，一個很有氣質、很美麗的女子。但看完這段文章後，被她的真、她的愛所感動。我們常說藝人是騙子，表裡不一。但我們日常生活中，有多少人可以像劉若英那樣？用力地去愛一個人，用心地表達。

在我認識的女子當中，有一個人我是十分欣賞的。她是一個用心去做事的人！在社會中，有很多你死我活的事情，我們不能避免地要身處其中，會有很多令人不開心的事情。但她像劉若英一樣，可以保持一顆赤子之心。試問，有多少人能做到呢？

我希望她可以保持一顆赤子之心，快樂地生活，身體健康。

一年會長的任期

2009-12-05T18:36:00.000+08:00

在2009年，我身為一個商會的會長，任期一期。這一年間，經歷了很多不同的人、事和物。感覺好像過了平時的幾年一樣，只會更精彩，更令人回味。有會友的支持，很多事情不再只是夢想。

記得在上年的周年大會中，本人的演說借用美國前總統甘迺迪在就職演說的一段話：
不要問你的國家能為你做什麼；
問你自己能為你的國家做什麼！
這正正是我在這一年的座右銘，結果是，我得到的比我付出的多很多很多！

在付出的同時，不知不覺間累積了很多經驗、智慧、友誼等。

「豐功偉業的基礎就是尊重每個當下的小事，而不是一心追求崇高偉大。」
商會有今日的成就，不是會長的功勞，是靠每一位會友所做的每一件事。聚沙可成塔，會友的堅持、團結及努力，便成為一個很好的基礎，讓我們可以跑得更快、飛得更高。

付出和收穫

2009-02-04T01:09:00.001+08:00

年青時常常會說，怎樣才可以學到更多的學問？得到更多的經驗？怎樣才可以讓更多的明師欣賞，在其門下學習？

近兩年，有一個深刻的體會。如果你可以不問收穫的付出，你一定可以數以倍計得到回報。像父母一樣，他們不問回報，照顧自己的子女，讓他們成長。子女在年幼時不懂事，可以不知父母心。但在成長後，一定會有所感動，用真心去回報父母。

像情侶，你的另一半在你生病時照顧你，時刻查看你的情況，你會無動於中嗎？

在公司中，如果你可以在時間許可下，幫手做一些不是你份內的事，上司一定會看到的。

我這一兩年，用很多時間在一些社團工作，籌辦很多不同的活動。在一開始時，只是用一個服務社會及訓練自己的心態。但在活動間，項目管理技巧的訓練、人際關係的了解，前輩的教導，是我在之前不能所想像的。

在一些商會中，很多人用搵生意、識勁人的心態去參加。但往往到最後不能得他們所想的。無私的付出和有目的的參予是有分別的。

哈哈，多月無更新。今天有感以發，希望大家唔會覺得雜亂哪。

貴州之旅

2008-10-28T17:29:00.000+08:00

今天是我們在貴州的最後一天。本人是第一次到貴州。之前聽很多人講貴州山區小朋友的情況，但絕對不及親身感受的直接。

親身感受下，了解他們怎樣為了上學，需要步行３～４個小時去上學。路不是香港的平路，是上山落山的泥路。

我看看他們自帶的飯盒，發覺有一個是花生做餸的，是我們平常在酒樓的前菜花生，但原來這已經是很好的餸菜了，因為還有營養價值。其他的小朋友很多是一些酸菜，完全無營養價值，為食的我試了一些，味道怪怪的。

我們用來帶物資的紙盒(紙皮)，小朋友拿了回家。在家訪時，發覺他們的屋是用木板所建的，木板間有很大的空隙，便是用我們的紙皮所覆蓋，這是我不能所想像的。

希望這一次的貴州之旅，可以帶給我們朋友、學童及青少年感受多一些中國大陸學童的情況。

共勉之!

大碼 vs 中碼

2008-07-28T00:47:00.001+08:00

今日去買裇衫，間鋪走中上路線。

我售貨員幫我攞件中碼衫俾我試，我穩重的身形，通常都係要大碼，中碼真係得？試完之後好fit，真係減肥成功？開心之餘，仲立刻買多一套西裝。抱住輕飄飄及自以為有型的心情繼續shopping。

之後去G２０００試了一件大碼，感覺上仲細過件之前件中碼，可能和剪裁有關係，但係立刻覺得之前間鋪好嘢！每間公司大中細碼的定義各有不同，但如果個客覺得自己fit左，開心之餘，仲有可能買多一些東西，策略上便可算是成功了。當然他吸引我的地方和他的設計和剪裁也有一定的關係。但係從買裇衫中可以感受到一些營商之道，今日真係有所得著。

跑步 --- 意志力的鍛鍊

2008-04-06T10:58:00.002+08:00

我習慣一個星期做二次運動，一次會是跑步。

可以的話，我會跑一個鐘。我的身形可說是十分“穩重”，跑一個鐘對我來說真係攞我命三千，仲厲害過家英哥的發明。但從參加毅行者的經驗得知，長跑和毅行者重視的，是一個人的意志力多於一切。如果没有意志力的話，常常會玩一會便停下來，失去了帶氧運動的意義。如果你有意志力的話，是可以完成的。

一個小時對我來說，有一個特別的比喻，我會比喻一個小時是一年的時間，１２個字係一年１２個月。如果我們的意志力可以年頭維持到年尾，年頭定下的目標便可以達成了。每一個人在新的一年開始，往往定下不同的目標和挑戰。但隨時間的過去，往往淡忘了目標，或再次定新的目標。年復一年，很多目標便很難達到。

各位老友記，仲記唔記得自己年頭時的目標呀？各位一齊努力，一起達成我們每年之始時定下的誓言吧！

靚女真係好些?

2008-03-15T12:46:00.001+08:00

同大家分享一個故事：
我相信海關有自己的一套的入境抽查守則，以增加查出非法物品的機會。

我有個朋友靚女T，個樣真係幾得，衣著入時，佢經過時你會轉頭望個隻。

有一日，佢從大陸返香港，衣著真係好靚，她也是一般的香港人，返大陸都會買幾隻老番回港，過海關時，海關的人員叫停她和叫她入去查看，她驚到震震地，當海關的人員拿出她的“國內手信”時，望一望．．．．

海關：什麼來的？
靚女T震震地：VCD(電力上升到１０萬伏特)
海關：是正版嗎？　（隻VCD個包裝冇問題，但一定知係老番）
靚女T震震地：係呀，阿Sir (電力上升到１００萬伏特)
海關：唔！咁以後唔好買咁好正版哪。
靚女T：Yes Sir

以上內容係靚女T親口同我說，我笑到直左。

What a Wonderful World

2008-03-09T23:21:00.000+08:00

這是一首我很喜愛的英文歌，意境令我有一種很放鬆的感覺

這首汽車廣告最喜歡用的曲子是由路易斯‧阿姆斯壯(1901-1971)，美國最偉大的爵士大師於垂暮之年所唱。

I see trees of green, red roses too
I see them bloom for me and you
And I think to myself what a wonderful world.

I see skies of blue and clouds of white
The bright blessed day, the dark sacred night
And I think to myself what a wonderful world.

The colors of the rainbow so pretty in the sky
Are also on the faces of people going by
I see friends shaking hands saying how do you do
They're really saying I love you.

I hear babies cry, I watch them grow
They'll learn much more than I'll never know
And I think to myself what a wonderful world
Yes I think to myself what a wonderful world.

by George David Weiss & Bob Thiele

捐血

2008-03-05T00:57:00.001+08:00

回想第一次捐血，使在我１６歲生日。第一時間在午飯時走去捐血，返到學校仲可以去踢波，仲要係守門員個隻，問你死未？

今日係第５６次捐血，晚上同朋友食飯，飲左半枝紅酒左右，個人立刻有少少暈。唔認老都唔得哪！

有人問我做咩成日去捐血？其實起點係我的爸爸。細個個時，見到爸爸封信有個紅十字架，打開一看，發覺係一張３０次的捐血咭。爸爸的偶像指數立刻升左好多，覺得爸爸捐血救人好威！個時我應該係小學四年級左右，立刻想要盡快可以去捐血，小朋友都會模仿父母的行為，對吧？

當我數年前，得到３０次捐血咭的時候，都有一些感慨！我終於站在和爸爸相同的線上了。到現在保持大約三個月捐一次血，是覺得我少少的行為，便能幫助很多有需要的人，何樂而不為呢？

希望每一個香港人都有捐血的習慣，那麼便有很多人受惠了！

三次機會

2008-03-02T09:24:00.000+08:00

在同一件事情和經驗中，我通常會給同事三次機會。短期內犯三次同一個錯誤，真係需要請他離開我的公司。

人誰無過？第一次的話，可以說是給機會同事學習，如果他能從錯誤中學習，也可以說是對公司有益。但在短期內再犯第二，三次的話，是不是說明他不能從經驗中成長嗎？

香港九成九的企業是中上企，人數有限。一個同事出錯的話，對公司影響好大。大企業可能一件事情可以好多人負責，對十幾次先出街。公司仔的話，好可能大家也是全民也是兵，個客見到個同事唔得，便會覺得你公司唔得，到時便好大件事了。

可能好多人覺得我好無情，但為了公司的發展和利益，無情一些也需要的。

健康 vs 美食

2007-12-23T10:18:00.000+08:00

我視美食為人生一大享生，許你一個願望，是希望每個月可以食到一間有質素的餐廳。我對傳統美食更是熱切追求，但當年的美食同現代的健康標準，真係完全是２回事。

膽固醇萬歲！！！

老實講，係咪一餐半餐食得超標，便有損健康？如果真係要餐餐食白烚雞的話，真係慘過去死。今日睇生果日報，睇到蔡瀾兄的文章，真係令我熱淚盈眶。他對生命和享受的態度，對我今日追求美食的生活有一定的影響。當然，如果好似佢拍“蔡瀾嘆世界”咁，有江希文一齊浸溫泉，咁就發達哪！

＿＿＿＿＿＿＿＿＿＿＿＿

健康版 (蔡瀾)
健康版讀報紙，最討厭的是那頁健康版，即刻扔掉或跳過，從不仔細閱之。千萬不能看，一看人生就少掉一份樂趣。最先，你會失去豬油的美味。
從前的人，每個都吃豬油，不是那麼好好地沒事？現在有人「忽然」發現豬油有膽固醇，對健康有礙，就不敢去碰它，還強辯道：「從前是從前，從前食物營養不夠，豬油才沒事，當今豐衣足食，豬油會害死人。」
是呀，我也知道，但我沒有叫你天天吃呀。偶爾一次，有什麼問題？你們天天吃植物油，也不見得好呀。為什麼跟流行吃西餐，牛油就那麼一大塊，一大塊往包上搽？牛油比豬油好得多是嗎？
再來，內臟也完蛋了。那麼好吃的東西，從此在你的人生消失，只要你一舉筷，老婆兒女都來禁止，他們讀了健康版，都忽然變成醫生。
要吃就吃嚼之無味的白肉，紅的不行，牛扒也少了，啃雪白的雞胸肉最佳。每天多吃沙律，吃得變成兔子。
自從發現午餐肉會有致癌物質之後，你甭想再嘗此味。前一陣子的孔雀綠讓你把魚也戒掉了，蘇丹紅把你的老朋友雞蛋也趕出門框。水喉水不淨，礦泉水又有細菌，最後渴死為止。
每天都有新花樣來嚇你。每天，你家人從你的生命奪取一部份喜悅，就算你是樂天的，是豁達的，也要把你化成一個腌尖聲悶的憂鬱人。
如果遺傳基因主使你的一生，那麼健康版會改變你的命運，讓你事事沮喪，導致自殺。
我一再說，健康有兩種，肉體的和精神的，你的肉體再健康，但你的精神已有病，那麼癌症隨而來，還不如快快樂樂做個飽死鬼算了，想吃什麼就吃什麼吧！
要戒，來生才戒；此世，不要刻薄自己！
如果家人什麼都不給你吃，不要緊，找二奶去！你要吃什麼就給你吃什麼，這麼一來，你才會得到平衡，你才不會發瘋。

中原老板的名言

2007-12-14T18:03:00.000+08:00

他常常對子女說，如果用2小時溫習，考試可以攞到A-，就不需要用8小時溫習, 去攞A或A+了。

用在工作上，也絕對適合。好多人會嘗試做對最好，但是，做到最好要用的時間便和工作效益不成正比了。

三”唔”政策

2007-12-03T23:16:00.000+08:00

今日同個差唔多年紀的朋友食飯，佢做人和做生意十分圓滑。我請教下佢有什麼心得，佢同我講最重要係一個三”唔”政策。

唔該
同什麼人都要講唔該，同個客要講、同秘書姐姐要講、甚至同清潔阿嬸都要講，禮多人不怪。

唔好意思
凡事認低威，無論大錯、小錯、無錯、甚至唔係你錯，總之講多幾句唔好意思，包你無錯。

唔緊要
肯蝕底、肯原諒人，發生什麼事都講唔緊要，有事慢慢講。

真係一言驚醒夢中人，大家做生意為什麼先？做係求財的，對吧？有問題坐低慢慢講，大事化小，小事化無！最終目的係求財，唔係求氣！

有朋只遠方來之掃街

2007-11-29T01:13:00.000+08:00

有個識左二十年以上的朋友從美國回港渡假，真係同佢由細玩到大。

行程如下：
去水貨鋪買耳筒俾佢老婆及外母大人
去旺角老字號涼茶鋪食龜靈膏，佢仲追加左杯２４味
每人在G2000對面食十蚊牛雜和五蚊魚蛋燒賣
再去食半個炸皮蛋，外層有魚肉包住，再整多串炸魚蛋，可能係天氣問題，凍冰冰咁
去好景對面食“肥媽媽小賣店”的生腸、豬心、豬腎，總值十五大元，佢話外個鬼佬節目有介紹過，鏡頭影住時，肥媽媽係咁講“no photo, no photo”，加手部動作。超低能，勁攪笑！
去西貢小巴站對面，再食印度簿餅，十蚊大大個，好好食
之後，我們老人家怕熱氣，每人買左杯五花茶

如果你今日，在旺角見到個肥仔西裝友，手拿一串，眼神在找第二串，這個人便是我了。

佢已經好耐冇食過咁地到的街邊小食，佢係美國，最懷念係香港的街邊小食和凍奶茶。我也因為心情太好的問題，完全投入街邊搵食的心情。

有時間唔中，都會食街邊嘢，但好耐都冇試過咁盡興，食到個肚好似大肚婆咁。食完之後，不禁好似以前那些大俠，幹完三斤羊肉和三斤紹興酒，然後大笑三聲說：“痛快！痛快！痛快！”

副業

2007-11-21T18:32:00.000+08:00

每一個生意人，常常都會想做幾種生意，分担下風險。有人會將錢用來投資在股票或樓市，炒下炒下，賺得會仲多過自己間公司。

生意唔講住，這１～２個月，真係全人都炒股，連我的母親大人，都問我抽新股好唔好？師奶指數真係好高！

我當年剛剛出來工作，儲左少少錢，就投入股票市場，有賺有損。但係果段時間，真係常常上網，睇住個市，升小小和跌小小，完全控制左我果日的心情，嚴重影響我當日的工作表現。

做左老細後，有時都會玩下股票，但係我真係好細胆，常常留意升跌。咁工作表現當然唔好哪。

到現在，我都會玩下股票，但係一定買１２０％有實力的股票，買個些放係床下底１０年都唔驚個些。同做生意一樣，我做生意的目標，係為我做成被動性收入，一些我唔駛做（或投入少量時間和精力），都能夠每月為我產生利潤，咁就最好了。你問我，我寧願穩定地每月賺＄１０，都好過一時賺＄２０，一時倒蝕＄５。

浮誇II

2007-11-12T17:06:00.000+08:00

今日路過旺角中心，諗起一段往事。之後食飯同朋友講起，我細過到中學生時代，真係好不知所謂，話說中學年代，一日鼓起勇氣，入左旺角中心行左個圈。以下是和朋友阿水的對話：

馬老板：好驚呀！
阿水：驚咩呀？
馬老板：剛剛行完旺角中心
阿水：咁都唔知你驚咩喎？
馬老板：個商場好多女仔，成個商場都係賣女仔嘢，好唔自在呀！發誓以後一個人唔入去呀！

全枱人同一時間噴飯，笑聲大到要俾間餐廳列我地做黑名單！佢地笑完仲要話我作大，係到搞氣氛！大佬，真珠都冇咁真呀！
細個時的馬老板係和尚寺讀書，真係冇機會接觸女仔，同女仔講嘢會口震震。讀大學又係全男班咁，邊有機會識女仔，係出來做嘢之後好左少少。

所以，雖然我五音不全，但係去到唱K，都一定唱高難度之作“浮誇”！

浮誇

2007-10-29T18:50:00.000+08:00

昨日，去聽陳奕迅演唱會，當某一首歌音樂一起時，Vivian立刻望一望我，我精神為之一震。正是“浮誇”！

首歌好聽是一個原因，但歌詞正正說出我當年的情況！

我常常同一講，我細個時好怕事，因為男校出身，常常盼望有機會識女仔，但係真係傻仔一名：
“那年十八　母校舞會　站著如嘍羅”
這一句歌詞，真係說到內心中！

小弟好少去唱K，去唱K都係同人吹水多。但第一次唱K見到個歌名，立刻吸引我的注意力，歌詞再出，已經令我不能自控的跟唱下去！
細個時，真係好缺自信心，常常做一些誇張的動作，去吸引人的注意力。但現在知道，他人對你的觀感來自你的自信心，自信心來自內在的實力，我們要不停地武裝自己，做好準備。

有人問我　我就會講　但是無人來
我期待　到無奈　有話要講
得不到裝載　我的心情猶像樽蓋
等被揭開　咀巴卻在養青苔
人潮內　愈文靜　愈變得　不受理睬
自己要攪出意外　像突然地高歌
任何地方也像開四面台
著最閃的衫　扮十分感慨
有人來拍照要記住插袋
＊你當我是浮誇吧　誇張只因我很怕
　似木頭　似石頭　的話　得到注意嗎
　其實怕被忘記　至放大來演吧
　很不安　怎去優雅
　世上還讚頌沉默嗎　不夠爆炸
　怎麼有話題　讓我誇　做大娛樂家
那年十八　母校舞會　站著如嘍羅
那時候　我含淚發誓各位　必須看到我
在世間　平凡又普通的路太多
屋邨你住哪一座
情愛中　工作中　受過的忽視太多
自尊已飽經跌墮　重視能治肚餓
未曾獲得過便知我為何
大動作很多　犯下這些錯
搏人們看著我　算病態麼
REPEAT＊
幸運兒並不多　若然未當過就知我為何
用十倍苦心　做突出一個
正常人夠我富議論性麼
你　叫我做浮誇吧　加幾聲噓聲也不怕
我在場　有悶場的話
表演你看嗎　夠歇斯底里嗎
以眼淚淋花吧　一心只想你驚訝
我舊時似未存在嗎　加重注碼
青筋也現形　話我知　現在存在嗎
凝視我　別再只看天花
我非你杯茶　也可盡情地喝吧
別遺忘有人在　為你聲沙

中秋節

2007-09-26T12:21:00.000+08:00

首先，祝大家有一個快快樂樂的中秋節假期！

每年中秋節，都係月餅生意的黃金（唯一）的檔期，廣告和宣傳鋪天蓋地。但有冇月餅生產商做過一個統計，買月餅的用途主要是什麼：
自用
送禮（客戶）
送禮（親戚）
送禮（同事）
求婚　:)
最後一個應該為數少之又少，如果真係有的話，請告訴大家呀！我會送一些月餅給我的員工及客戶，以表示過去一年合作的謝意。但有時心諗，送月餅給家人，特別係輩份高的那一些，中秋過後，家中分分鐘有超過十盒月餅，食又食唔晒，轉送他人又太遲，真係一個好大的浪費。

中秋節是一個一家團圓的日子，一家人坐埋一齊食飯，絕對俾收到什麼月餅開心。可能人大咗，好重視過時過節，和家人團聚的機會。

星期一同自己屋企人食飯，同父親大人講起，因為很多恩恩怨怨，如果有一日最高層（我的祖母）仙遊的話，咁大家見面的機會真係少之又少。其實可能你見你的同事或樓下看更，見得多過你的親戚，但係，做得親戚真係一種因果，佢地真係睇住你大，睇住你發達（我都想 :) ）。如果可以的話，我都會努力維繫我家人的關係，話晒我都係長子嫡孫！

5個人清潔100間房?

2007-09-12T23:57:00.000+08:00

有留意澳門消息的，都知道威尼斯人酒店爆到七彩，下午Check in要等到晚上11時。惡性循環之下，客人見遲左Check in，點到住番夠本，有咁遲，得咁遲Check out。

我覺得咁大規模的項目，一開頭有混亂在所難免。當年我地個新機場，一開場已經日日上報紙頭版，唔係做手續要等幾個鐘；就係顯示屏出唔到資料。但一年後，已經得獎無數。任何項目一開頭都會有個磨合期，這樣，便要睇管理層的功力，如何轉危為機。

5個人清潔100間書房？聽落都覺得有問題，雖然我唔係酒店界，但係得５個人做１００間房？唔會晚上１１時Check in，而係無可能Check in。希望磨合期儘快完結，因為都諗住１０月中去住番一晚。

從酒店人手比例，可以了解到每個行業都有一些叫做黃金比例，幾多人，做幾多產品，跑幾多數，完全有個估計。管理層永遠想少少人，做多多事；員工永遠想多些同事，分担下工作量都好。管理層如何在兩者中取得平衡，便是一個大學問了。公司要在最少成本下，取得最高回報，又唔可以做死班伙計。

朋友生病了

2007-09-07T16:44:00.001+08:00

一陣間我會去探病，我朋友今年四十三歲，無端端中風，而家正慢慢地康復中。

他平日都生活好健康，唔食煙、唔飲酒，得閒做下GYM、打下Golf，做銀行中高層，簡直係模範的生活和工作。同佢閒談間，先知道佢屋企好多人有這個病，佢都不能幸免。

近年體重和年齡都不停上升，近一年，都開始做多一些運動，每個星期都會跑１～２次步，做多些有氣運動。我雖然係蔡澖係信徒───“膽固醇萬歲”，為咗美食，會不惜勞苦、唔理那些什麼指數、什麼不飽和脂肪酸．．．．等等。但係為咗６０歲都可以日日精精神神，唔好要用紙尿片，都係要注意飲食，做多一些運動。

不過，如果有好嘢食，都係個句：　膽固醇萬歲！！！

生意難做！

2007-09-04T23:55:00.001+08:00

前日得閒，同朋友Felix食飯，Felix佢開Franchise生意。係香港，佢算係最早期的一批。高峰期有２０～３０個加盟商，每月收加盟費和管理費都幾好賺！佢係我偶像之一！估唔到佢同我大吐苦水。

佢話這幾年難做咗好多，當你生意一好，大財團便會來分享你的收成．地產商和鋪主會大力加租。好多時一個生意的利潤只有營業額的１０～２０％，業主一加租就加你５０％，你話點做？

多元發展的財團，更會做埋你個行。打個比擬，咖啡文化其實早在Starbuck進入香港已經開始了，當時有很多不同的咖啡店，自從Starbuck不停地開分店，很多小型的咖啡店已經做唔住，要關門大吉了。

這一二年，氣氛係好咗，但係好多時會集中有錢個班人度或金融行業，小市民想分享經濟的成果真係好難。我這些蚊型小司，租金、人工、物料成本樣樣都加，真係要做好我份生意！

我同Felix都覺得，執行力係好重要！你空有一個很多的想法或生意概念，但你冇足夠的能力去執行，讓概念變成實體，是没有用的！

澳門賭業

2007-08-26T08:51:00.001+08:00

今朝睇生果日報, 講人人都想做荷官, 未畢業中學生想做, 冇學歷師奶想做. 我想起之前我朋友Nelson的一段說話.

Nelson係澳門人, 做電訊業, 係高級經理的級數, 因為工作關係, 個個星期都會來香港工作1~2日, 有時都會同佢食午飯.

佢話而家澳門真係比賭場抽走晒D人材, 就算佢地做電訊, 賭場的收入起碼多3~4千蚊, 所以個個月都有員工走. 佢覺得澳門的賭業有些似香港當年的科網頁, 終有出事的一天.

好多澳門的中學生走左去做荷官, 人工有成1萬4千蚊左右, 比起平均中學生收入多左成一倍, 好多叻仔叻女走左去做荷官, 攪到其他行業有晒人材. 幾年後, 澳門其他行業仲唔出現斷層? 到時真係唔知點算.

同埋如果你正正經經搵份工, 到你有一定的經驗, 人工都會水漲船高. 但係做荷官, 升職的路真係好似金字塔咁, 賭場絕大部份的職位都係荷官, 真係幾時先升到做經理或高級荷官呀?

到班中學生做得幾年, 黃金學習期已過, 都只係練得一雙金睛風眼和無敵快手, 到賭場真係飽滿而俾人炒, 佢地可以做什麼呢?

一個地區如果經濟過份集中一個行業, 好容易出事. Las Vegas經過多年的演變, 集旅遊、賭博和會議於一身. 澳門好明顯係走這一條路, 希望澳門成功哪訊elson

HIM + 車王雜誌

2007-08-26T02:11:00.000+08:00

今日手痕, 見HIM和車王雜誌一齊賣, 只需$18, 手痕痕就買左本.

從一個供求角度, 這一個組合真係幾能滿足男性的要求
大量美女圖片 (唔駛解釋瓜?)
大量性感美女圖片 (同上, 唔駛解釋瓜?)
大量靚車圖片和報告 (男人就係鍾意多些報告, 同人吹水時都好似有D料到)
時裝加靚錶 (現代的男性都會打扮下, 起碼可以見得下人)
仲有一小本 “動漫Babes消暑寫真” ß 對象是後生仔?
又有一個講大貨車和車頭的專輯 ß 對象是大隻佬司機哥哥?

廣告方面, 竟然起碼有2隻牌子的安全套廣告, 車呀, 錶呀, 一應俱全

何止3個願望, 簡直係滿足了男人9成幾的願望. 以前一本都要$30幾蚊, 而家$18有3本(連埋本小寫真). 真係好得, 包裝上, 佢唔係好似一周刊咁2本重疊. 而係2本水平放, 用硬咭紙固定. 視覺效果上, 已經好吸引, 你行埋去書報攤, 想睇唔到佢都幾難.

南華傳媒, 你係得喎!

講明先, 本人和南華傳媒完全冇任何關係(我都想有關係), 只係議事論事!

炒人

2007-08-22T00:43:00.000+08:00

相信我，無一個老板鍾意炒人，你需要投資在一個員工的時間、金錢、心機．．．．等等，絕對係到非不得要也不想炒人。不過，今日終於要出手了！

同事Ah Yan來左我公司一個月左右，一個新人唔會要求有什麼生產力和效用，但求肯學嘢，出錯後可以改善，慢慢學便可以了。Ah Yan個完全係死牛一邊頸，常常用對朋友的語氣對上司和客人說話，要求她做一件簡單的事情，可以１０分鐘後完全忘記晒。

新同事入職，大家的要求都是做到最基本的事情，同一件事情，錯第一次叫做攞經驗，第二次都可以叫做唔小心，第三次便死得了。

今日叫左佢入我間office傾，給她最後機會，要她唔好再犯相同的問題，佢話唔可以，驚做唔到。大姐呀，同一句說話，可唔可以用一個圓滑一些的說法同人講呢？例如：
“我驚我做不到，不過，我會慢慢學，請俾多一次機會我！”

佢咁樣講，真係促成炒佢的理由。同埋，個員工如果咁樣都唔駛俾人炒，會好影響同事的事氣和老細的公信力。炒她是唯一的選擇，

穿衣的問題

2007-08-18T16:07:00.001+08:00

今晚要去一個生意上應酬晚宴，我一個女性朋友問我應該穿什麼去。佢驚太誇張會搶主人家鏡，太隨便又會俾人話。

我係男人，真係唔識答呢個問題，男人最方便，一套西裝便可以應付大部份的場合。如果寫明係“Black Tie”，咪打番個Bow Tie和踢死兔一件，都没人記得個男人上次穿咩嫁哪。

女仔（或女人）就大問題好多了。我有個朋友屋企有幾套去飲的Ball衫，都幾索幾得嫁。不過佢話要買多一套，原因係下次去飲班朋友，已經見個晒佢所有的Ball衫，真係服左佢。

前個班謝師宴期間，通間都係穿到成個大人咁的小朋友，化晒行裝，set晒頭。留意番D髮型屋，好多都有一些謝師宴套餐。一個幾多錢，四個平D，十二個仲平。仲包埋化裝．．．等等，香港人的生意頭腦和轉數，好嘢！

寫Blog的壓力

2007-08-12T16:40:00.001+08:00

知道渣老板決定休Blog，請係覺得好可惜，Blog檀少了一個精英分子。

常常有人話寫Blog好大壓力，每１～２日一定要出一個Blog，唔出唔舒服。我開頭都係咁，成日想出Blog，久而久之，真係有壓力未解決。

我而家的想法是，Blog係一個我放鬆思維的地方，將自己的想法和意見，放在網上，讓朋友看看。如果真係做到本末倒置，咁又何苦呢？所以，如果你們有留意，我D Blog通常都係：
週未出
幾日出一次
或一次過出幾個Blog

每次出完Blog後，我都有一種放鬆的感覺，腦海的思維全湧出來，真係幾舒服嫁！

渣老兄，希望你早日回來，以解大家相思之苦呀！

八號風球

2007-08-10T16:47:00.000+08:00

今日是本年度首次的八號風球，我在外工作的同事２點鐘已經call番公司話３點鐘掛８號波，唔返來哪，天文台網站完全死直，２點鐘時，我個Friend話中環MTR太多人，要關門大桔，真係誇張！

而家係下午５時，公司完全没人，一個客戶電話都無，整個人完全係１２０％投入工作，不受外界影響，工作效率真係去到２００％。

其實，如果一些住係交通安全地方的人，善用這２～３個小時，應該都可以清晒好多平時積下的工作。

好哪！夠鐘走哪！祝大家有個平平安安，快快樂樂的週未！

忙

2007-08-06T01:13:00.000+08:00

在香港，人人都會話自己忙，忙工作、忙追女仔、忙讀書，真係咁忙嗎？

今日聽了一個講座，講者將忙定了一個很有意義的解釋。忙字是由樹心邊加死亡的亡字，“忙───心死也”，一個人如果常常話自己很忙，每日忙住一些没有意義的事情，每日到了最後，只帶一個很倦的身體回家，行屍走肉！這樣有意義嗎？

今日，同一個勁人談話，佢的生意十分成功，公職多到一籮籮，這個集會已經係今日第５個會議了！佢仲話，一D都唔忙，好開心，覺得生活好有意義！

我們每日都有很多公事和私事會佔據了自己很多時間，但我常常反思和自問，很多時候真係無事忙。在公司做下東、做下西，已經中午了，食埋飯、做下嘢，已經下午４～５點了！整天的時間便没有了。

我希望定下原則，每天放工前，call多一隻客、做多一樣對公司好的事情，比別人和同行做多一步，已經很好了。

書中自有黃金屋？

2007-08-02T13:54:00.000+08:00

昨日，買咗本“常務島耕作”睇，我諗唔係好多人知呢本漫畫。作者是弘兼憲史，透過一個日本白領的事業歷程，由白領到現在的常務（等於香港的董事長），將世界經濟、不同行業的發展帶出，以最近一期便說印度服務業的發展。真係好好睇，我成日覺得，你睇一本書，只要中間的１～２點對你有啟發，你便發達了！佢仲講咗一些日本巨型企業嘗試收購外國的娛樂事業，從以踏出日本，如果有留意日本近１０年的經濟新聞，都會估到佢暗示邊一間企業。

就好似美國連續劇West Wing，講美國總統忍暪自己有MS（唔記得係什麼病），點樣講俾內閣知，點樣面對傳媒，就真係一流哪！講邊個總統和發生什麼事，大家一定估到哪！

呀渣兄唔見咗，希望佢一齊安好，佢之前介紹咗本書How to get rich? 作者係Felix Dennis，雖然未睇晒，不過，有個point 好得：
“大部份人覺得做得有錢佬，主要係２個原因：
１．有一個好機會
２．幸運
但是，九成成功的生意人，都係將一個有咗好耐的概念，將它不停的改善和將公司流程和運作改善，便可以成功了(例子：McDonald)。”

真係佩服到五體投地，我成日都想諗一些好得的生意，又出名，又有成功感。但係，做生意為什麼？我諗唔少人係為咗成功感，出人頭地！但我身為一個普普通通的生意佬咪為咗錢！真係唔好本末倒置。

曾灶財心臟病發九龍皇帝駕崩　（論專注力）

2007-07-26T15:43:00.000+08:00

今日睇到報紙先知呢個消息，以前住九龍時，常常見到他的墨寶，近幾年佢收山，少咗出來蒲。

有人話佢有精神病，後尾又話冇，但係佢份堅持和毅力，真係好過好多人多多聲。如果我做生意有佢份執著和專注，真係唔知退休左幾耐囉！後生時行毅行者，上個西灣山上到我真係有幻覺，想死咁。後來日練夜練，行樓梯返屋企，先可以完成整個毅行者的比賽。

學空姐的行李篋話：
http://petitelaine.blogspot.com/
如果我將咁多年對男人既專注、耐性、毅力同誠意用o係我既工作，我應該行入Chanel買2.55唔使睇價錢。
如果我將咁多年對男人既專注、耐性、毅力同誠意用o係我既瘦身行動，我應該瘦到得棚骨。

一個人做事或做生意，只要他的專注力比其他人高１０％，已經發達了。

WII – 一部真正入屋的遊戲機

2007-07-22T21:00:00.001+08:00

WII, 勁！
WII, 掂！
WII, 得！

原因係客戶目標的問題，成班Friends玩得，一家大細玩又得。當食完飯，外母大人攞部WII出來，插好晒D線（佢平時連關電腦都驚整壞佢），示範俾我睇，點樣打Bowling，攞到２００分，我就自己呢部嘢利害呀！

大多數的遊戲機，目標客戶都係清晰：
PSP　追求視覺享受的大男孩
NDS 追求開開心心，有趣得意遊戲的人

我覺得佢最成功的地方，是將一些打機的動作立體化，由４隻手指的活動，轉為全身的活動，打WII網球時，如果你投入，真係會打到身水身汗。好似以前街機玩滑雪，就吸引左好多男仔帶女朋友去玩，我當年都有帶Vivian好玩。

如果香港有得買WII隻股票，我真係會將２０％的身家（都好少嫁J）放落去。不過我這個明燈，都係專心做生意好了！　J是DS ngstpersonal.s,

商場　───　金魚商場

2007-07-22T20:13:00.001+08:00

旺角有條全香港出晒名的金魚街，全香港的金魚愛好者和鍾意小動物的人，都會定期來朝聖。在星期六日，起碼會有４～５架Benz泊左係到。

你係大老細，見到條街咁得，一定想成條街抄番一份去第二度，到時仲唔肥仔！這樣，香港個邊，便有一個金魚商場，整個商場都是一個大業主擁有，佢幫你入埋貨，你幫佢買貨，一來，商場的貨品組合便可以控制在一個平衡的情況，二來，首次創業的老板仔，最驚的入貨和宣傳，便完全解決了。開張個時，好多報紙傳媒都有報告，聲勢幾浩大，佢仲係金魚街，一個當眼位，買咗成座大廈的一面牆個廣告。我心諗，香港島的金魚愛好者有福了，唔駛長途跋涉來九龍買嘢，time cost都慳番唔少。我仲同身邊的人講，呢個老細真係有D料到！

終於的起心肝，２個月前去個商場走左轉，點知同想像完全２回事，有一半的地方桔咗，星期日都係好明顯係一些街坊食左飯，無嘢做來行下，有人流，無現金流。最旺個間鋪，竟然係一間茶餐廳！

其實，香港好多有主題的地區和商場，如：
太子金都商場　（婚嫁用品出晒名）
旺角波鞋街
深水埗的黃金電腦商場

都係經過年月的洗禮，商戶自然的聚集在一起，成功真係唔係必然。香港係一個做生意的好地方，稅率和法律都有利做生意，但係成唔成功，真係好睇天時、地利、人和，我都要努力努力！

商場　───　行街商場 vs 街坊商場

2007-07-22T19:50:00.000+08:00

我有一個幾得意的習慣，就是行下商場，唔只行一些自己鍾意的商場，係什麼商場都行，一些死場經過的話，上去看一看。，旺角好景都會上去行吓！都認得下好景當年代言人“四樓有四仔呀！”

係商場做生意，首先一定要俾２～３個月按金，一些旺區鋪頭仔３萬蚊租的話，都要成１０鬆D萬，再每個月一定要俾的管理費、宣傳費．．．．等等。真係一筆幾大的固定成本。

固定成本的重要，是無論你做幾多錢生意、有生意、冇生意都要俾，所以對一個生意的影響十分之大。香港商場出名貴租，所以我便鍾意睇下人地點樣做生意，可以在商場生存。睇下唔同商場的客戶組合，如何才能為商場帶來最多的利益。

有些商場話有幾好的人流，幾好的宣傳，但如果行街個D，唔係你的客戶目標的話，人流幾多都無用。好似如果你開補習社，海港城一流夠多囉，就算收你５００尺２萬蚊超值租金，你睇下你做得幾耐。

一個有趣的例子，便是奧海城一期和二期。二期是一個行街的商場，吃喝玩樂，好多娛樂都會有。但係只係相隔一條天橋，一期便完全是一個街坊的商場，補習社，美容鋪．．．．等等。信和當年都想將一期做成一個運動主題商場，趕走晒D補習社，連魚翅城都俾佢趕走，當年如果有留意的話都幾大件事，人地一間酒樓，裝修費幾十萬，一句６個月通知期便要走，真係哭都無謂，但係商業社會便是這樣，合約精神呀！同一個鋪位，如果係做十蚊店和做買電器比較，我諗租金起碼相差一倍以上，商場大業主一定信將個商場upgrade做潮流商場哪！

如是者，信和仲在半空整左個Michael Jordon入樽巨型公仔，真係好有型，入左幾間運動鋪，但係就做極都做唔起。好似隔左１～２年，便要做番一個街坊商場，當年俾個叫走的鋪頭都番左來，魚翅城便是其一！有趣！Business is business, nothing personal. 做生意真係無永遠的敵人和朋友。

無記性

2007-07-22T14:25:00.001+08:00

好多時，都會叫同事幫手做一些小事，但係佢地好多時會大頭蝦，完全忘記左有呢件事，第日問番佢，先笑笑口，Say Sorry!

我語重心長地叫佢地，驚唔記得就用簿仔寫低，佢地係就係有寫低，但係就無習慣睇番自己的筆記。有些同事寫在紙仔上，東一張，西一張，攪到亂晒。

我覺到冇記性係人之常情，但係點樣改善，和有冇心去改善，便要睇自己了。如果可以改善自己的缺點，一步一步慢慢地改善，到最終，一定可以達到你老細的要求，做到一隻fit馬！

餐桌禮儀

2007-07-22T13:44:00.001+08:00

哈哈！呢到唔係朱玲玲教用刀叉、說話的禮儀，而係將自己近排去飲的經歷寫出來。

去飲個時，會見到D細佬仔係到玩玩具，媽媽出盡九牛二虎之力，先可以叫佢放低D玩具，扒幾啖飯。

去飲好多時都係同一些好幾年無見的朋友、老死。上一次去飲，有２個老朋友都未食完乳豬，就攞部PSP出來打機，食埋碟帶子都未打完，只係見到佢個漸成形的旅遊名勝───地中海。

好老實講，好多時同枱食飯，各自修行。但係基本禮貌，都應該同朋友吹下水，講下近況，都成３０幾歲人哪。我有時都會睇下漫畫，本講紅酒的“神之水滴”和講企業社會經濟的“島耕作”(李嘉誠都睇)仲係期期追，但係都唔係成班人臉前睇嫁。

有樣嘢仲搞笑，通常鮑魚仔都係一人一件，食咗就無。有個Linda用隻筷子左轉右轉，以為佢挾唔到。想幫佢手，原來佢想要在中間、最大隻、吸左最多汁的“鮑魚仔之王”，真係比佢吹脹！佢坐係我身邊，通常我都會幫女士挾嘢食，佢講完之後，真係唔識幫哪，最後，只可以俾埋我個隻佢。

朱培慶事件 ───　香港新聞

2007-07-18T13:19:00.000+08:00

琴日，經過報攤，見到西周刊２個封面都係朱培慶事件的女主角CoCo，生果日報也有詳細內容報告CoCo的專訪。貪得意買來睇下，內容十分露骨，CoCo姐真係爆盡名流的韻事！

根據維基百科，新聞的定義是：
新聞，是以報紙、電視、廣播節目或網際網路的形式對最新事件進行的報道和傳播。涵蓋範圍包括地方、全國以至全世界。新聞報道有自己特定的寫作格式，記者要以第三者的身份作客觀和中立的報道或調查，新聞報道通常經由通訊社（包括電視台、電台、報館等）傳播。

其中，客觀和中立這２點，我不作評論。在外國，會有小報專門報導這類型的新聞．主流報紙會以國家大事和影響民生的事件作為主打。

香港的傳媒只不過將大部分人的有興趣的新聞報導，當年劉嘉玲事件、Cream的濕身照．．．．等等。全部１小時內買晒，市民冇興趣，佢地都唔會刊登，何罪之有呢？

我唔係扮清高，我都係一個市儈、好色、視金錢如生命、不擇手段．．．．的生意佬。我只係可惜，香港的閱讀和傳媒文化比較少選擇。我們年青的一代，並不能有充足的選擇下成長。

Die Hard 4.0

2007-07-17T00:29:00.000+08:00

見渣兄寫得咁好, 我又寫下先!

我呢D正正係睇Die Hard大, 由Die Hard 1, 睇到Die Hard 4. 真係有一種情意結在內。

有一套美國電視劇 “Friends”，有個主角叫Joey，想租Die Hard 2，但租咗Die Hard 1，Ｄ人問佢發生咩事，佢理直氣壯地說：睇２次Die Hard 1便是Die Hard 2囉！其他２個主角Rose同Chatter互望一下，３人同時手握拳頭，充滿男人氣度地豪叫了一聲DIE HARD，每次睇番都好好笑．

其實，我地呢D大細佬，真係會有情意結嫁，以下便是我番睇了多次，番睇又番睇的電視劇和電影

Friends
West Wings
X-files
Brave Heart
God Father

朱培慶事件（危機管理）

2007-07-15T12:19:00.000+08:00

今日先講朱培慶事件可能有些遲，但係就一件公關和危機處理事件來看，我有一些看法。

男女的看法大都咁２個方向。

男的通常認為一個成功人士做事能力和私生活可以完全分開。例子是美國第４２任總統克林頓，美國在他的領導下，經濟向上。

女的會覺得他那種鬼鼠的行經，令人對佢冇信心。

其實, 我覺得這件事可以當係一個危機處理的問題. 阿朱生可能第一次俾人捉正, 唔點d反應, 選擇逃避, 没有面對大家及媒體.

我唔想評論他的對和錯, 但係就一個公眾人物的事物來評論, 他的處事手法就唔合格了. 不過, 佢都應該唔駛再面對同樣問題了(因已離職)。

Jack Welch都曾經講過，一個危機發生，你要假定佢會不斷變壞和惡化，你要儘快處理。

好多時公司有問題，唔第一時間處理，希望佢慢慢淡化和消失。多年俾學費的經驗下，知道係冇可能的，問題只會惡化！所以，做事真係要當機立斷：

問題同事　───　改唔道就炒
得罪客戶　───　主動ｓａｙ　ｓｏｒｒｙ！
運作問題　───　一定要改善
士氣問題　───　儘快面對

黑面神與一號笑容

2007-07-15T11:59:00.001+08:00

我公司有2個同事：
黑面神佢做嘢幾落力，好多時可以自己跟足這個計劃，但係對自己唔鍾意的同事（和老板）會黑起塊臉，成村人得罪佢咁。

一號笑容佢對客好得，任何時候都可以保持一號笑容，Ｄ客都好鍾意佢．不過有時會走精面，做嘢效率和速度冇黑面神咁快。有時都會吞下ｐｏｐ。

黑面神會覺得一號笑容唔肯做嘢，冇什麼ｔｅａｍｓｐｉｒｉｔ．我諗我都要安排同事負責唔同的任務。一號笑容可以主要對客，黑面神可以做ｏｐｅｒａｔｉｏｎ層面的事情，睇下會唔會好ｄ．

數字賓客

2007-07-15T10:51:00.000+08:00

琴日去一個細個時D波友仔個婚禮．一入到去，通常會搵下個坐位表，睇下坐邊同有冇靚女一齊坐．

一望之下，七成幾朋友都係用數字代表，如ＰＣ４６７１、ＰＣ９３９４，我先記得我朋友做差人ＰＴＵ．咁我今晚都一定幾安全，咁多枝槍係到．不過，又唔係好明，唔通佢地平時都係叫Number?七　

今晚都係靜靜地坐係到．如果唔係，食完炸子雞，唔係食炒飯，而係食皇家飯呀！

女人的玩具II --- 鑽石

2007-07-14T00:36:00.001+08:00

女人的玩意中，我比較認同的是鑽石，一件鑽石的飾物，真係可以夾唔同的打扮和場合．

以前，有一個廣告“買粒鑽石，獎勵下自己”，我常常和愛人講笑咁講，佢話“好呀，我用你張附屬咭買囉”．但係呢個廣告成功的地方，真係增加左女性買鑽石俾自己的百分比．連我咁少睇電視，都記得呢個廣告，你話幾成功呢！

鑽石，相對起衣服和手袋，又真係耐用好多．一樣價錢，我寧願買粒鑽石俾愛人Vivian，好過買隻卡地亞哪！

女人的玩具 --- LV

2007-07-13T23:40:00.000+08:00

琴日，我同個朋友去尖沙咀間德國酒吧（新世界中心對面，面譜隔離）Happy Hour．氣氛幾好，可以試下！

見佢係個ＬＶ手袋中，前前後後，攞咗１個LV銀包，２個不同款式的LV散紙包．共有４個LV係身！！！有冇攪錯，我問佢屋企仲有冇？佢話“你話呢？”

每次我經過尖沙咀廣東道間LV，就算係平日下午，都可以係人山人海，收銀處永遠係有10人以上在等攞袋．
有買散紙包的學生哥 X２
有買銀包的靚靚OL和有錢太太 X ５
有買袋俾女友，老婆，情人，阿二，阿三．．．．的西裝友　X５
有超大量入貨的祖國同胞　X　無限大

ＬＶ的魔力真係好得，我諗．．．佔女人的玩具龍虎榜一定係頭５位！個款永遠係一個格式，一個品牌發展得咁成功，真係所有做生意人仕的學習對象．

有冇女網友（或男網友）可以發表吓感受？銀就 ian

男人的玩具 III

2007-07-09T22:16:00.001+08:00

之後讀到渣估兄講有人開架勁車，在旺角宣威．講真，我都好膚淺下嫁，如果有一日我架車飲咗Red Bull，生咗對翼．改埋個名複姓林寶，名堅尼，咁就安樂了．

之前我講個，我有個朋友的玩具是有一座以他命名的商業大廈．我聽完後，簡直當他神咁拜．

以我現在的思維，我的終極玩具是一間食意大利菜的餐廳，重點不是搵大錢，重點是有一個地方和我的朋友吹下水，飲下紅酒．

第二就真係有能力（多餘到唔恨的餘錢）買加趕絕外母型同有翼的跑車．

有時，你的玩具目標不妨set高D，咁可以俾個目標你努力呀

I am not a plastic bag

2007-07-08T16:26:00.000+08:00

我心酸是見到個1x的靚你, 理直氣壯地同電視台講唔公平,無天理. 話自己排左10個鍾頭都無個bag.

讀咁多書, 世界上唔係付出就有收穫, 同埋, 間公司晨早講明已經買晒, 唔駛排隊, 你個D時間, 如果用來讀書或做其他有意義的事情, 係唔係更好哪. 我係你阿爸就真係無眼睇

男人的玩具 II

2007-07-08T16:12:00.000+08:00

講開玩具，自從貪得意買咗個酒櫃仔返屋企之後，真係用多咗時間飲、買、研究紅酒，我唔係扮高班，但係飲落真係幾有趣．

早２日去連卡佛睇中咗個Decanter，要成２千幾蚊，真係幾貴．去上環間公啟行睇，佢專做玻璃酒杯批發，好多大酒店都係搵佢入貨，又冇我要個款．都係諗多幾日先．　：）

男人的玩具

2007-07-08T16:05:00.000+08:00

前日，同班朋友仔出來吹水，有２條友快快趣攞咗部PSP出來對打，十問九唔應．好似部PSP好重要咁．先後問番，原來話有一關很難過，所以過埋佢先停．

好多時，每一個男人都有佢的玩具，細個時可能係玩具車，大個咗可能係真車、Hifi、紅酒，有錢佬可能係Golf，遊艇，飛機．．．．等等．所以，D人話男人大唔透，又真係幾真．

我細個時都好鍾意打機，可以打到朝頭早５時都得，但係而家人大咗，要小心選擇自己的玩具，一日得２４小時，如果你用咗３個鍾來打機，咁仲有幾多時間呢？

呢幾年鍾意咗飲紅酒同Golf，覺得可以深入研究和幾有趣，有本漫畫叫做神之水滴，真係有幾多紅酒知識嫁，同埋又可以同人Social時吹水．你話，在Business Dinner時，同人講紅酒好，定係同人講點樣在PSP隻game過關好．

員工問題 --- 冇交帶

2007-07-04T08:21:00.001+08:00

好多時，同事都要出去做Function，會真係好忙．我好多同事會自己完成工作，但會有以下問題：

遇到問題，可以試下自己解決先，但係公司的同事和老細可能有經驗做類似的方案，同事一句說話，可能你要３０分鐘先知點做，仲要做到無咁好．經驗是加起來的．如果下下都要由頭開始，真係會用好多時間在交學費上．創業頭幾年已經交咗唔少學費哪，真係唔想再交．

老細可能set咗一些時間表，希望同事跟到去做和打番公司，報告情況．好多時，同事真係會忘記咗，大佬，想你打番來，唔係想check你去左邊，係想知道進度的發展，有錯都可以有時間，最重要係機會去改，你做完先打番來，甚至第日見面先講，好多野已成定局，想改都改唔到

Google Adv.

2007-07-01T23:07:00.001+08:00

今日終於手搵加咗個Google advertisement, 一來搵下零用錢, 二來都想了解下這種想法有幾有效. 咁多位Blog友, 有幾多人真係收過錢嫁.

我今日去游水

2007-07-01T10:44:00.000+08:00

我今日見有幾日假期，走咗去公共泳池游水．去到先知政府七一普天同慶，游水唔駛錢，好！

但入到去見人丁單薄，同平日假期差唔多．我諗好多人同我一樣，去到先知游水唔駛錢．游完水，上一上網：
http://www.lcsd.gov.hk/beach/b5/index.php
原來阿公網頁都無公告天下．

其實，政府如果唔主動公告天下，最起碼在入口貼將海報，等多一些人知道，會唔會好D呢？好多時做一個project，如果宣傳唔夠，你個project plan 得幾好都無用．

員工離職

2007-07-01T07:00:00.000+08:00

今日收到個員工的resign letter, 心情已經無以前咁激動, 希望盡力留低佢.

一個同事俾你大信封, 最重要係評估佢的功能和如何能替代他. 聽落好似好無情咁，但係一間公司要健康運作，真係要間唔中有人要走下，老細都係人，人的問題就是唔鐘意有改變．如果有人走吓，公司都要改組一下和研究一下有什麼問題．

好多時同事覺得自己對公司很重要，無可能無咗自己，唔好咁哪，人真係唔會無咗邊個唔得（感情也是J）

不過，如果一個人有多種功能和能力，咁自己在公司和社會的價值又真係會高D，所以，唔好怕辛苦，老細俾多些嘢你做，如果時間許可的話，一定要努力試吓呀

中學座談會

2007-06-29T01:27:00.000+08:00

今日，為了還人情，幫朋友去一間中學講Career Talk．內容都係個D，但係，最有趣的是，個D預科生，問十句先答一句，用了九牛二虎之力，先問一句，答一句．２０分鐘之後先可以warm up.

我成日覺得，出來做野，最重要的是Presentation Skill，就算你做工程師和會計師，頭十年埋首苦幹．但到你做Manager時，你都要做Presentation俾老細、老老細和客戶，如果到時先學，就遲了

學校是一個很好的學習平台，但係主要教一些Hard Skill, 一些Soft Skill如Leadership, Presentation, Project Management，就完全没有了．到大學先因為做project要識，性格已經形成了．要改也很難

所以，今日到最尾，我都同D學生哥講，要爭取機會做Presentation，做Team leader，先可以有足夠彈藥，在社會大學打仗呀

同事遲到和紀律問題

2007-06-27T12:31:00.000+08:00

我通常每日會８時左右番到公司，同事通常９時左右返到，有一個同事常常９點半先到．老實講，只要你做到嘢，我真係唔需要你日日準時９時前到，但如果日日都遲半粒鐘，對公司的紀律和同事有好大影響

終於捉左佢有來講２句，佢話佢以前份份工都遲到，都無老細講．大佬，無人講唔代表你做到對，只不過每間公司的情況唔同，我覺得，一個同事遲到，會影響其他同事，到最終公司的紀律會有影響．

過咗２個月後，個同事都係無改善，最後通告，都係有善的分手，佢本身能力又唔係冇人代到，自己又唔醒目．希望佢下一份工會好D哪
好多人會覺得我過份注重守時問題，但我覺得守時是工作最基本的要求，希望搵到新同事可以達標哪

人工問題

2007-06-26T00:22:00.000+08:00

今年請的同事, 人工起碼比上年多咗2成, 人的素質就分別不大. 所以, 同工不同酬一定會出現, 要睇下你幾時入職, 幾時轉工. 冇得投訴, 同事如果投訴都無計. 佢能力不足我又唔想加俾佢

前幾日有班醫生投訴同工不同酬, 我覺得我們不是生活在共產社會, 收入和前途有很多因素控制, 咁我97買咗樓, 唔同賣番俾李家誠咩. 班醫生可以在好景時quit咗佢, 跟住apply第二間醫院, 同一個職位. 咁咪得囉?

我無意得罪任何醫生, 他們工作的辛苦不為外人道. 但係真係在香港生活和工作, 就要接受這個事實哪

同事請假

2007-06-25T18:03:00.000+08:00

我公司都算Ok. 有10日有薪假期. 我不留都鼓勵同事請假, 休息下, 充下電. 不過, 有時同事請假, 都會估下佢係唔係公搵工.

經驗來講, 如果真係去見工, 都會係去請sick leave, 因為對方唔會等你2~3日去請假. 所以, 通常間唔中都會捉同事入Office, 吹下水, 了解多一些近況, 出面風大雨大, 我都贊成他們在我度做幾年, 儲下經驗先.

80:20 法則

2007-06-25T00:13:00.000+08:00

我每日會在8時左右返到公司，清除垃圾電郵（真係好多，起碼幾百封）、回覆簡單電郵、完成簡單工作（如工作分配．．．．等等），直至每日９：３０分開例會．這個半鐘，絕對係高度集中和高效能的時間，效率絕對好個成個下午，因為好多時要照顧同事，對客戶吹水和討論，所以我好珍貴個個半鐘．

細個時看個有關８０２０的書籍，覺得好特別，好有用．宜家先知不得了．如果你每日能有效運用你最高效率的時間，一定可以完成很多不同的工作．

同樣道理，如果可以應用在找客方面，就可以更有效率地搵生意．以前公司細，什麼客都接，客仔A和客仔B用的時間可能差唔多，但係生意額可能相差１０倍，你係我，你會點做？

同事問題

2007-06-22T12:52:00.001+08:00

今日, 阿蘇同我投訴有同事只識做表面嘢, 在我背後就吞Pop, 想想玩辦公室政治.

我動作, 安撫吓佢!
我心諗, xyz!

同事在老細背後做吓自己野, 吞下Pop, 我當年都有, 成個MCSE都係在吞Pop的情況下考番來, 但係, 最緊要係做到野, 交到功課俾老細睇, 咁就無問題, 做得你老細, 吞Pop招數一定高你幾班, 點會唔知, 不過隻眼開, 隻眼閉就真.

不過, 除咗做到野, Team Spirit 都好重要, 如果一個同事做獨家村, 其他同事杯葛佢, 都幾大件事, 一間公司唔需要一些A級人馬, 但就一定需要一班幫到手, 有team spirit 的B級人馬, 個個A級反而唔好, 因為佢唔會留係你間細公司到.

中央冷氣

2007-06-19T18:40:00.000+08:00

今日番咗公司做野, 因為假期的關係, 公司無冷氣, 真係熱到除咗件上衣, 下次如果轉寫字樓, 真係要諗下安番部冷氣機, 等留夜咗可以舒服D, 宜家只係靠部風扇你吹下吹下, 好過無!

有個同事請咗假

2007-06-18T22:29:00.000+08:00

今日我有個同事請咗假, 搞到同team的同事踢晒腳. 細公司就有呢個問題, 小咗一個同事都好覺眼. 個同事做到面都青.

放工時, 都捉咗佢埋一邊輔導吓佢, 如果唔係, 分分鍾睇唔開, 聽日送個大信封俾我, 又唔係咁市儈, 員工做得辛苦, 都係要鼓勵下佢, 等佢知道工作有表現, 老細是有眼睇的.

生意目標及理想

2007-06-18T13:27:00.000+08:00

有次旅行，同個朋友Y吹水，佢事業好成功，有幾間分別好得的生意，他說他的目標是有一座屬於他生意王國的大廈．利害！

我就無佢咁有大志哪，可以買到架法拉利（用完全多餘的錢）和開一間自己鐘意，不用理會生意的意大利餐廳便滿足了．

繼續努力！

匯豐卓越理財

2007-06-18T12:05:00.001+08:00

之前渣估兄說在卓越理財櫃台辦事時，撞到朋友會有一種優越感，我都認同．

不過，今日在卓越理財櫃台時，看到老遠有個自己的前輩，大我十幾年左右，社會地位及職位都幾高，平時個樣都好有錢呀！在排普通櫃位，就真係兩難了，打招呼好似有D怪（好招積），唔打仲怪，當我在師奶時，他已經走咗了．
不過，我覺得都應該唔好打招呼，已存厚度，大家點睇？

父親節

2007-06-17T17:58:00.000+08:00

好細個開始, 爸爸已經不和我們一起住, 反而可以和媽媽保持關係, 所以, 父親的感覺對我來說, 不是很強烈
但人開始長大, 令我知道一個父親的偉大, 因為發生什麼事, 他也是你的父親. 星期三去咗睇佢, 睇到我一年比一年老, 一年比一年瘦, 一年比一年多白頭髮, 真係有點不是味道, 我真希望自己早一些生性, 早一些懂得考順父母的道理

車展

2007-06-17T17:36:00.000+08:00

今日經過海港城車展, 細心觀察, 發覺:
細佬試車手位多過大人 (唔通睇定20年後要買的車?)
男人通常好細心睇個Specification
女人會好細心鉗住個男人 (唔通驚個快得滯買多個阿二?)

我比較鐘意去車行睇, 起碼舒服D, 和唔駛同小朋友爭試車? J

同事意見

2007-06-16T17:34:00.000+08:00

琴日, 有同事Last day, 通常我都會同last day 同事吹下水, 給一些建言給他, 當然, 最希望大佬佢都俾返D指引小弟, 改進下我間蚊型公司都好.

我通常每月都會和同事一對一, 隻秋隻, 吹下水, 通常都話無問題, 幾好幾好! 不過一到最後一日, D意見會多過過去意見的100倍! 無奈!

其實如果同事可以開心見誠, 會唔會不用給我resign letter 呢?

星期六的下午

2007-06-16T17:23:00.000+08:00

我有個同事, 逢星期六會返阿嗎到食飯, 所以會留係公司留到6點幾, 我成日覺得, 同事要有足夠的休息及私人生活, 返工時的效率先會提升. 所以, 我今日終於在3時多, 落閘放狗, 等佢早些上阿媽到, 同阿媽吹吹水

開波哪

2007-06-16T17:20:00.000+08:00

做咗數年Read only 的網民, 都係時候上網發下"偉論"哪!